政情：廢腑之言：「辰」獻策：調低內地GDP

生意做得出色嘅港區全國人大代表新丁田北辰（田二少），尋日就失驚無神建議內地，應該將經濟增長率（GDP）調低至百分之六至七，話訂得太高只會令企業盲目追求增長，而放棄生產品質，好似內地媽媽到香港搶奶粉，就係對內地奶粉品質冇信心。睇怕領導人同經濟學者會被田二少嚇到一額汗，事關內地十三年來GDP未試過低於百分之八，堅持維持相對快嘅增速，係要確保提供足夠就業機會，如果唔係政治就出亂子喇！其實內地奶粉信唔過源於企業盲目追求利潤至真，由品德教育或者法例監管着手，係咪對症啲呢？