政情：孖根海南種番薯有成果
前立法會議員鍾樹根同前漁農界議員黃容根（根叔）喺九月立法會選舉落敗，雖然兩人政壇失意，但生活就相當充實。話說根叔孖住樹根喺內地搞生意，去海南種植日本番薯，啲番薯真係快高長大，話咁快已經有收成喇。早前根叔就同埋樹根及另一拍檔前立法會議員李國英，齊齊去咗海南視察番薯種植及收成。雖然啲番薯只係種咗兩個月，但就已經有手掌咁大個，相信佢哋好快就有錢賺喇。
樹根之前都講過，種番薯容易覓地，而且四個月就可以有收成，利潤仲非常高，每斤種植成本只係港幣三元，但就可以賣三十多元，售價係成本嘅十倍，真係諗起都覺得和味。根叔近日就去到海南文昌昌灑一個種植農作物嘅試驗示範基地，實行親身視察，睇吓啲番薯。佢哋拎起個番薯，成隻手掌咁大，都忍唔住話︰「兩個月都咁大，四個月唔得了！」真係見到啲番薯，唔使食都甜到入心。
