政情：「傳」承青年團 鋪路做議員

李梓敬所講嘅，喺卸任自由黨青年團主席一職。佢喺網上講到青年團由最初小貓三兩隻，到依家佔自由黨人數嘅一大部分係得來不易，但一個位置唔能夠做一世咁話。

符曾出戰區會補選

新一屆青年團將會由現屆副主席符傳富「升呢」做主席，兩名副主席則會由現屆執委陳建業，以及謝翹章出任。從事會計嘅符傳富曾出戰區議會補選但落敗，其後轉為幫航運交通界易志明工作，所以有傳畀佢出任青年團主席，增加曝光率為準備四年後接班。

李梓敬接受查詢時強調今次青年團換屆實屬正常，因為以往每兩年進行一次換屆。雖然上次換屆係喺八月舉行，但今年碰上立法會選舉，加上該黨領導層亦有變動，所以等一切完成後先進行換屆工作。

再者，唔同政黨嘅青年團都有定期換屆，而佢已由一一年起擔任主席，認為要有更替先對青年團有健康發展，所以早喺立法會選舉前已講明，不論選舉結果都會退任主席，完全並非因落敗而心淡。對於主席人選，李梓敬就話主席一職冇乜人競爭，只係綜合個人背景同政治歷練後認為符傳富較為適合咁話。

李梓敬退位 專注地區

卸任青年團主席一職後，李梓敬稱除咗黨領導層職位外，其他銜頭並冇實務性，所以會集中專注地區事務，但未來青年工作將會減少。

被問及立法會因宣誓風波，分分鐘有機會搞補選時，佢認為事件係因辱華而起，所以建制派有贏嘅需要，但大前提需要協調先有機會。佢認為建制派若然面對補選，一定要以大局為重去協調，佢個人亦會全力支援該名人選，不過佢相信若經協調後，佢嘅出選機會唔大。而若然由佢出選，並唔會限死選區，因為從政始終都係以服務全港市民為主咁話！