政情：劉下戰書 要吳得掂收回「規劃」論
教育局局長吳克儉（吳得掂）上周發表偉論，話大學生自殺，未有做好生涯規劃係其中一個原因，其言論隨即惹來外界炮轟。一早已經話支持吳得掂唔住嘅立法會議員劉國勳，尋日正式向吳得掂下「戰書」，批評佢言論係喺受情緒困擾嘅學生同受害家長傷口上灑鹽，再次要求吳得掂收回有關言論。
質疑頻頻外訪成效
劉國勳話，其實上周六已經喺一個場合當面要求吳得掂收回言論，但對方支吾以對，話有問過警方學生自殺案件嘅嘢同做過研究，拒絕收回言論。劉國勳尋日再打電話畀吳得掂要求會面，點知原來吳得掂去咗上海外訪，所以佢就決定下戰書。佢仲話，吳得掂成日外訪，都唔知學到咩返嚟，遲啲會喺立法會提出質詢，問下吳得掂外訪使咗幾多錢同有咩成果。
除咗外訪，劉國勳仲計劃就中學文憑試考生升大學情況及停止向學校發放「廣泛閱讀計劃津貼」提出質詢，都係針對教育局。佢就話因為自己一直都特別關心教育議題，同埋吳得掂真係做得唔好喎。