政情：公民講場：香江「豬」事不順 高官自身難保

一批由內地供港嘅哮喘豬近日流入市面，有問題嘅豬肉竟然可以通過檢測送去肉檔，搞到人心惶惶。食物及衞生局局長高永文尋日出嚟撲火，唔單止主動認衰，承認把關程序或唔止一個地方出錯，更兩度就事件致歉。佢又話未來會花兩至三星期時間檢討，強調責任唔喺肉檔，政府甚至考慮作出賠償，但係班無辜「上榜」嘅肉檔仍然怒火中燒，揚言考慮向申訴專員公署投訴添！轄下嘅部門連番出錯，呢次高永文就算「跪低」認錯都甩唔到身喇，睇下佢仲有乜辦法自救？