政情：周浩鼎肯跌肯撞 獨愛欖球

Holden話喺英國讀書時一直有打欖球，雖然自己無外國人咁大隻，又唔算跑得好快，但因為肯跌肯撞，所以當時同學都好歡迎佢參與。佢話透過欖球可以訓練團隊精神，所以就算返咗香港，都曾經喺東涌成立地區欖球隊，同街坊練吓波。不過，佢慨嘆香港打欖球嘅場地不足，令運動難以發展。

奧運睇好新西蘭隊

講到今屆奧運有乜心水欖球隊，Holden就按個人經驗，估計冠軍應該係新西蘭嘅囊中物，至於其他項目，佢話對跳水最有興趣，都會抽時間支持吓跳水王者中國隊咁。