Anyone But CY（ABC）呢句嘢，老朽定性佢係「讖語」，但大家又唔使咁上心，信之則有，不信則無；之不過，若閣下認為呢句嘢確係「政治」，老朽亦唔反對。然而，大家要認識到：政治能夠成功並持久，首先要獲得合法性，而此合法性來自人民。土耳其軍人政變失敗，明顯是得不到合法性，即人民的支持。為政者在位時若只有民怨，再要爭權奪勢往往是自討苦吃，甚至會自取其辱。
回歸正題，ABC呢句讖語若靈驗，老朽個人認為立法會主席曾鈺成可以參選下屆特首，亦大有勝望。何以見得？皆因曾鈺成在告別八年主席生涯之際，憑改歌詞寄意，叫人耳目一新，他「忘盡心中情，遺下愛與癡」，自嘲「會議廳苦中自娛，立法會好多奇事」。不過，即使立法會被嘲垃圾會，佢對班「垃圾」無不極盡包容之能事：服咗AV仁，(目及)女要用手機；長毛好無譜，亂掟嘢撳唔住。
曾主席又諷刺建制派議員：嫻姐、張宇人、大輝，仲有怪醫，鬧政府似足泛民，問契仔稟咗西環未？更戲謔民建聯兩大笑星元秋和Tree根，前者係「搵嘢講，用肺就容易」，後者係「開邊瓣，只有天知」，知人善彈，唯曾主席一人也。嗱！曾主席是否能令香港發展經濟、改善民生，老朽唔知，但係要團結各方，除咗佢至叻，老朽數不出第二人。
當今社會撕裂，矛盾尖銳，沒有大胸襟大智慧休想團結各方，你話你會飛都冇用啦！曾主席最後嘅肺腑之言係香港一定要贏！阿哥，這就叫正能量，與港人休戚與共，百分百政治正確，誰還介意曾主席親中還是地下黨員？
曾主席除了忘盡心中情，又以「紅棉」寄意：我正直無偏，英挺好榜樣；加上曾太的勁舞，二人同心，境界全出矣！ABC讖語成真，我buy曾主席，皆因佢有數學頭腦、文學胸襟、歷史識見，難得人才也。