政情：懷疑極端組織 比國扣查林子龍
社會主義行動成員林子龍日前到比利時準備出席一項活動時，畀當地執法人員懷疑佢係「極端組織」成員，一度將佢鎖上手銬全身搜查，但最後仍然畀佢入境。比利時同法國、德國一樣，最近曾發生恐襲及深受難民問題困擾，唔知今次事件係咪同社會主義行動力撐香港「假難民」嘅立場有關呢？
隸屬社會主義行動
社會主義行動尋日發出新聞稿，披露林子龍喺剛過去嘅周日前往比利時布魯塞爾，準備出席一個國際左翼學生運動嘅夏令學習營，喺機場入境時遭當局粗暴扣查，包括要求佢交出手機、扣上手銬，然後再帶到一個房間要他除衫搜查，期間唔可以同外界聯絡。
新聞稿又話，扣查期間，當地執法人員盤問林子龍嘅所屬組織同政治思想，懷疑佢係屬於「極端組織」。林被扣查約兩小時後，要簽署一份他睇唔明嘅文件先獲准離開。林要求對方發出文件證實自己曾經被扣查，亦遭到對方拒絕。