政情：集體退黨 新思維大地震
標榜「中間路線」嘅新政黨「新思維」，成立咗唔夠一年就爆發大地震，一共十名黨員、包括兩名副主席廖添誠同姜炳耀，尋日宣布集體退黨，令該黨一下子冇咗約八分一黨員。佢哋聲稱退黨原因係「道不同不相為謀」，質疑黨團利益同佢哋嘅理想有重大分歧。不過，據聞該十名黨員大部分都來自新界東，退黨嘅真正原因係不滿該黨嘅選舉部署同協調工作。
新思維主席狄志遠同餘下唯一一位副主席鄭承隆下午召開記者會，力圖淡化事件。鄭承隆推說仲未收到各人嘅正式退黨通知，如收到會嘗試挽留。佢又話若然真係有人退黨，佢當然感到可惜，係實際上同感情上都有損失，但佢同時強調「政黨就係咁，有人嚟，有人走」。狄志遠亦指事件同立場路線無關，認為該黨主張嘅非泛民、非建制「第三條路」經已確立，唔會受有人退黨影響喎。