中環出更：名人估歐國盃 英德睇低一線
歐洲國家盃正進行得如火如荼，日前卓妮喺沙田馬場見到牙醫學會會長梁世民（Sigmund），發現佢都係球迷一名，仲同大部分鍾意睇英超賽事嘅球迷一樣都有個情意結，對英格蘭情有獨鍾，但佢坦言並唔睇好英格蘭出線，仲揚言假如自己鍾意嘅英格蘭最後贏到冠軍，唔介意請晒牙醫學會成班執委食飯喎！雖然勝出機會就微啲，但波係圓嘅，一日未到最後都唔知賽果會係點，所以不妨聽住先！
Sigmund話好耐冇踢波，但就好鍾意睇波，仲有幾個出名嘅球星好欣賞。而佢家人有時都會陪吓佢一齊睇，不過就冇佢咁熱衷囉。轉頭見到佳能高級副總裁鄧慶治，佢話自己年輕時都有間中踢吓波同睇波，但依家就因為工作忙碌，加上好多時啲賽果往往同佢預期唔一樣，因此依家甚少追住睇嘞！佢仲諗番後生時最鍾意就係巴西同法國國家隊，仲笑言當時都有喜愛嘅球星，好似球王比利咁，一講就會畀人知道佢係邊個年代喎！
應家柏看好法國隊
曾經喺德國參加過職業足球聯賽嘅馬會行政總裁應家柏就話，雖然自己曾經喺德國做過足球員，亦都好鍾意德國，但就估計德國最多只係去到四強就會止步喇。講到勝出隊伍，佢就睇好主辦國法國國家隊，不過佢心裏面當然都希望德國隊會有驚喜畀到佢啦！
提到嚟緊九月新馬季將會增加多五個賽馬日，應家柏話預算會增加二十億嘅投注額，但佢相信唔會影響或押後馬季抖暑嘅時間，事關新加嘅賽馬日應該會被安排喺平日嘅晚上，例如星期三嘅夜馬居多。
卓妮