中環出更：仁愛堂學生團 西遊沙漠
仁愛堂每年都闊綽為學生舉辦深度考察團，繼考察南北極、珠穆朗瑪峰、東非肯尼亞及南美洲亞馬遜流域後，今年就計劃到訪中國古代絲綢之路必經之地新疆塔克拉瑪干沙漠，追蹤名著《西遊記》途經的地方，了解沙漠氣候轉變、生態及環保產業等。講起深度考察，當然唔少得極地探險家李樂詩，被問到仲有咩地方想去，佢就開玩笑話：「係男廁！」認真幽默。
遊歷各地 李樂詩想去男廁
仁愛堂尋日舉行全年大型籌款節目巡禮，對於今年考察新疆塔克拉瑪干沙漠，李樂詩就話今次佢只係負責畀意見同提示學生有咩特別要留意，而佢○九年起已經無再帶團喇。其實佢已經去過近一百個國家，講笑話想去未去過嘅男廁喎！而佢去過最舒服的地方，就係唔使煮飯嘅地方，因為佢唔鍾意煮飯，仲話無論去到邊，始終都覺得香港先係最舒服嘅家。
尋日出席嘅仲有主席鄧錦雄、副主席李愛平、吳騰、羅台秦、陳達華及總理郭志成等。鄧錦雄話，佢哋好關注香港老齡化問題，會開展「仁愛長者雲端健康管理計劃」，將長者健康數據上載至雲端系統讓家人掌握家中親人健康狀況；又會撥款屯門醫院推出「肺癌標靶治療前自費血液篩檢資助計劃」等。
至於總理沈運龍就會負責籌辦仁愛堂每年嘅名人名曲慈善演唱會，唔知佢到時會唔會拎埋公司嗰個鑲滿鑽石兼獲得健力士世界紀錄嘅「最高價值結他」出嚟彈番兩首呢？佢就笑言自己只係識唱唔識彈，但每人都有自己專長，除咗鑽石結他，佢仲自爆廿幾年前設計咗心形鑽石，可惜當年太年輕，唔識申請專利，依家就太遲喇。
卓妮