政情：收料站：自由黨夾十萬中六合彩一個字

據聞該黨多名立法會議員、區議員及黨員都紛紛夾錢響應億元六合彩，有人夾幾百元，有人夾幾千元，總共夾咗五位數字，其中榮譽主席田北俊更包底萬多元。不過，飲食界議員張宇人一向只會買馬，所以無夾；批發及零售界議員方剛唔喺香港，亦無份夾錢。而自認黑仔嘅青年團主席李梓敬亦無夾錢，但係咪意味佢今次行運慳番筆呢？

原本自由黨今次係想中六合彩，可以有筆錢發展地區工作，依家十萬元一瞬間化為烏有，惟有透過其他渠道努力籌錢。有口痕友分析該黨嘅投注，其實除咗買十五個字複式外，亦可以買十八個號碼半注複式，或考慮以一個號碼作膽拖配腳，橫掂該黨三十個字都中到一個字，應該有機會中到個膽，以增加機會率。