政情：「茂」論港經濟 放軟當長假
經典日劇《悠長假期》今年踏入二十周年，再次喺香港掀起熱潮，亦吸引咗唔少政界人士群起抽水。發展局局長陳茂波（波叔）尋日就借《長假》嚟談論香港經濟放緩，但講唔夠兩句又開始耍官腔，叫大家唔好將所有基建投資都稱為「大白象工程」、將所有旅遊問題講成中港矛盾、將任何涉及內地經濟協作貶為「迎合」、「討好」等。至於財政司司長曾俊華（鬍鬚曾），亦趁自己早幾日六十五歲生日，祈求本年度預算案盡快通過同香港經濟保持平穩。兩位分別負責香港土地供應同經濟財政嘅司局長一齊發開口夢，小市民都係自求多福穩陣啲。
妄想廢噏改變青年
波叔喺網誌中指出，《長假》當年大受歡迎，原因之一係劇情緊扣當時日本社會瀰漫住嘅「就業不安」氣氛，好多年輕人都對前景感到迷惘躁動；最近內地同全球經濟放緩，本港就業市場更接連傳嚟負面消息，包括迪士尼裁員、首季失業率回升等，為香港未來經濟及社會發展敲響警號；如果香港無法搵到新嘅增長動力，最易同最先受影響往往就係年輕人。
佢之後食住上，呼籲市民要客觀冷靜咁思考前路，唔好籠統地將具長遠效益同可發揮「逆周期」作用嘅基建投資稱為「大白象工程」，唔好動輒將可帶來許多基層就業機會嘅旅遊業訴之於中港矛盾，亦唔好將香港都有得益嘅兩地經濟協作簡單地貶為「迎合」或「討好」內地喎。但如果香港啲年輕人真係煲下日劇、再聽你廢噏幾句就會改變自己想法，特區政府唔使搞咁多嘢、嘥咁多錢推動青年工作啦？
曾生日許願少拉布
除咗波淑，鬍鬚曾亦喺尋日發表網誌，提到佢近幾年嘅生日都喺立法會預算案拉布戰中度過，過程一啲都唔好受，呼籲拉布議員以務實為民態度，唔好再無理拖延會議進度。鬍鬚曾又強調政府早前獲批嘅臨時撥款只夠用到五月底，到六月初就會乾塘，因此今年佢有兩個生日願望，第一係預算案可盡快通過，第二就係香港今年經濟可保持平穩。《長假》套劇最後係大團圓結局收場，各名男女主角同配角都搵到自己嘅出路，希望香港嘅年輕人同經濟發展最後都係咁！