政情：「四眼」租葉劉風水辦事處
外號「四眼哥哥」、簡稱「四眼」嘅本土派人士鄭錦滿，最近喺西灣河租咗個辦事處，為九月出戰立法會港島區直選備戰。四眼哥哥自爆，原來佢個辦事處嘅上上手租客，正係身兼行政會議成員嘅新民黨立法會議員葉劉淑儀，不過葉太喺早幾年已搬走咗，其後轉咗做一間教育中心，到依家再輾轉畀佢租嚟用。葉太租用該辦事處後，先後成功創立新民黨、連任立法會，近年仲做埋行會成員，風水似乎唔錯喎。
傳夥拍女建築師參選
「四眼」透露，同佢一齊結盟參選及推動「五區公投」嘅本土派人士陳雲、鄭松泰等，稍後亦會喺其餘四區設立辦事處，並希望做到每區辦事處都有唔同主題，例如佢個辦事處就會專搞電影放映會、漂書等文化活動。曾經留學荷蘭嘅靚女年輕建築師鍾琬媛Bonix，尋日亦有現身辦事處開幕禮，盛傳佢將夥拍「四眼」出戰港島區，擺明係想呃「毒男」票囉！