中環出更：路線過激 唔少黨友反對峯鴿出戰

涂謹申得票輸新丁

尋日該黨舉行特別會員大會，敲定九月立法會選舉嘅七人參選名單，結果雖然係「照單全收」，冇推翻支部嘅推薦，但當中外號「峯鴿」、出戰港島區直選嘅許智峯，取得嘅贊成票就不足七成半，即係有逾四分一出席黨員投咗反對或棄權票，反映黨內有唔少人不滿佢郁啲就趴地同瞓街嘅激進抗爭手法。

喺俗稱「超級區議會」嘅區議會（第二）功能界別，會員大會同意繼續派出兩人參戰，但教人意外嘅係「超級新丁」鄺俊宇取得嘅贊成票多過資深黨員兼現任超級議員涂謹申，阿涂真係好好檢討下喇！

至於爭取連任嘅九東胡志偉及九西黃碧雲，以及成功擊敗黨內多名對手嘅新東林卓廷及新西尹兆堅，就同樣以八至九成得票取得出選資格。今次表決結果亦意味，該黨三名資深立法會議員劉慧卿、何俊仁及單仲偕，九月後便會正式退下立法會火線，到時該黨嘅立法會黨團不論由邊個領導，相信同依家都會有好大分別。

卓妮