政情：辦米芝蓮兩日宴 「明」為健康
科學發展一日千里，好多科技都應用喺糧食生產，但係以人工方式催谷嘅食材，除咗惹來對人體不利嘅憂慮，亦可能對環境構成損害。香港醫療專業人士協會創會主席江明熙，打算以優質嘅天然食材配上十位歐洲米芝蓮星級名廚，將於五月炮製兩日宴會，宣揚健康飲食之道。佢話場地已洽談得七七八八，餘下就有待善長仁翁多多支持。
配合天然糧食
雖然目前並無明確證據話現代化生產嘅食材損害人體，但江明熙話，只要稍為探究食材嘅生產過程，真係令人好憂心，例如大量應用抗生素以防禽畜生病，又用賀爾蒙令牲口快高長大，縮短養殖周期。至於為防蟲害，對蔬菜施以過量農藥甚至基因改造，更為常見，而食材滲入化學物亦時有所聞。佢又話，雖然天然糧食不及現代嘅催谷手段咁高產量，但大家只要戒除浪費陋習，相信唔會出現天然糧食供應不足情況。