政情：政制發展等運到 黃碧雲聶德權互數

一舊雲喺會上鬧爆，話政制發展停滯不前，政制局可以改名叫矇查查事務局啦。又話政府駐內地有五個辦事處，質疑雙方係咪有保持溝通，武漢經濟貿易辦事處喺收到第一宗關於新冠疫情嘅求助時，有否及時向政府匯報，又問係咪武漢封城前就走咗五百萬人都完全唔知道呀？

稱已兩辦交流團遭議員冷對

聶德權回應話，政制發展工作唔係當局話做就做，係需要中央、特區政府及立法會三方配合，又話今屆政府努力促進議員同中央溝通，曾經兩次協助舉辦內地交流團，政府已踏出第一步，但就收唔到相應嘅回應喎。睇嚟係將責任推番畀一班議員啦！聶又強調駐武漢嘅同事有定期作匯報，但就話議員唔應該期望佢哋擁有處理公共衞生事件嘅經驗同知識，又話呢班職員已根據佢哋掌握嘅資料作適當判斷。

另一名議員尹兆堅（肥尹）就詢問台灣殺人案疑犯陳同佳，早前因洗黑錢罪刑滿出獄後，政府有冇透過港台經濟文化合作協進會與台港經濟文化合作策進會嘅平台，同台灣商討點樣處理呢個問題。政制及內地事務局常任秘書長鄧忍光聽完就話，如果雙方人員想會面，平台會轉達要求，但兩個平台並非司法協作安排，係唔會溝通案情內容或證據o架。

不符成本效益 棄用電子點票

另外，議員李慧琼就關注電子點票、派票問題，當局早前就解釋話安裝電子點票儀器唔符合成本效益，所以唔打算九月引入，李鬧爆咁簡單嘅問題竟然因為錢而唔做，質問當局會唔會重新研究有關方案。聶德權就話會重視同會持續推動選舉安排電子化，取代人手增加公平及準確性喎，但時間安排上有一定困難，估計今次選舉無法做到電子化咁話。