政情：中環出更：卿姐寄語：從政要「夠薑」
政黨新舊交替實屬正常，民主黨主席劉慧卿（卿姐）亦率先放棄競逐連任立法會議員，但面對新崛起嘅本土派，該黨新人能否接棒成功呢？卿姐尋日出席電台節目時話，佢理解嘅「本土」係指捍衞香港市民基本權益，令港人權利得到保障，同佢做議員嘅理念同路線無異，只係本土派多咗言語及肢體暴力。咁講法，本土派仲有咩優勢呢？
堅持唔似「本土派」暴力
卿姐話，雖然佢九一年參選時冇用上「本土」一詞，但認為自己過去絕對能做到「本土」，否則唔會成為七屆議員，暗示自己和該黨同本土派路線無異，無懼本土派搶走年輕人嘅選票。雖然卿姐認為其路線與本土派相同，但佢就話自己絕對唔會歧視弱勢社群，例如不以口音問題攻擊新移民，而且堅持唔會好似本土派咁使用言語及肢體暴力。
卿姐亦唔認同民主黨被年輕人唾棄，但透露曾經有年輕人不滿佢傲慢，重申該黨會虛心聆聽各方意見，除了年輕人，也要兼顧其他年齡層和界別的人士。佢亦寄語從政者要「認真、勤力、夠薑」，認為議員一定要敢言，不能害怕群眾起哄及被圍攻就不敢發表相反意見，否則只會招致失敗。
卓妮