政情：中環出更：內地蛇湯出貓 嚇怕韋國洪

韋國洪話，有次同啲朋友返內地，飲咗碗蛇湯覺得好好味，因此向大廚請教用咗咩材料，一問之下先知道原來自己飲嗰碗湯除咗蛇肉、雞肉， 仲有貓肉！嚇到佢即時打咗個突，唔敢再飲，仲話其實有雞已經夠晒味，叫師傅千祈唔好再落貓肉。而佢現時冬天除咗食羊腩煲同蛇湯，仲會打邊爐，話齋用清水加雞湯做湯底已經好好食喇。

藍國慶自製湯底防高鈉

不過，講到打邊爐，早前本報抽驗市面上多款內地及本地品牌火鍋湯包樣本時，發現不少湯包的鈉含量均屬高鈉，飲半碗已經超出世界衞生組織每日限量攝入二千毫克鈉的建議。博愛醫院前主席藍國慶及太太王雲仙就話，前一晚佢哋先至打完邊爐，但佢哋都係用自己煲嘅湯底，所以唔驚，至於好多湯包含高鈉，藍國慶就認為間中食一次應該問題不大，但唔好過量；而佢哋打完邊爐亦會煲木瓜雪耳糖水滋潤吓。

陳慕婷（左）及女兒Laverna（右）平日在家食飯會盡量少鹽少油少糖。

藍國慶（左）與太太王雲仙（右）用自家湯底打邊爐。（溫國佳攝）

至於保良局總理陳正欣太太陳慕婷及女兒Laverna打邊爐就唔會用湯包，會用豬骨做湯底，因為知道市面上嘅湯包較濃味，而佢哋平日應酬多，難得在家就會食清淡啲，盡量少鹽少油少糖，Laverna冬天仲會飲多啲暖水及媽咪煲嘅花膠湯添！

卓妮