政情：進念甩轆 話卿姐出櫃

錯植慢必資料

話說場刊第二句就指卿姐「是香港首位出櫃的政治人物」，之後嘅介紹內容就提起「出櫃」議員「慢必」陳志全，除介紹慢必有電台工作經驗外，仲喺一二年代表人民力量參選立法會新界東直選，成段描述都係關於慢必。再睇場刊入面嘅節目表，原來慢必都係嘉賓之一，只係同卿姐嘅出場時間唔同，好明顯係場刊出錯。

大會職員喺論壇差不多開始時先發現場刊出錯，即時派人收回場刊，並重新印製及派發。事後主辦單位承認一時疏忽，唔小心將資料調亂。進念二十面體可能唔係經常舉辦大型公開活動，點知一搞就「甩轆」，唔知卿姐知道後會否嚇親呢？

卿姐於活動後表現得好大方，話唔介意主辦單位出錯。