政情:高位買農行 KK慘變「小閘蟹」

受內地股市同希臘債務危機等外圍因素影響,港股近日起跌如坐過山車,唔少市民都成手蟹貨,唔知等到幾時先返到家鄉。工聯會立法會議員黃國健(KK)都喺呢個大時代做咗「小閘蟹」,佢話上月喺高位買咗內銀股農業銀行(農行),但就唔肯透露買咗幾多手,同喺咩價位入貨,淨係話係市場投資啫。

睇返農行一個月高位係四個兩毫九,上月多數都過四元,即使尋日港股全日升返八百七十六點,部分內銀股都有回升,但係農行就一仙都冇升過,完全冇起跌,收報三個五毫九。即係話,KK入貨至今,極有可能跌超過一成,認真黑仔。

唔憂血本無歸

跌成咁,一般市民可能都會心驚驚,唔知幾時先平到手,但KK就話唔算太擔心,相信銀行股點跌都唔會血本無歸喎,坐艇都好過依家沽貨蝕錢嘛。

第一手消息請下載on.cc東網iPhone/iPad/Android/Windows Phone Apps