中環出更：大劉「行差踏錯」 仆完又跪又坐
做人同落樓梯，都千祈唔好「行差踏錯」，否則隨時仆親！華人置業前主席劉鑾雄（大劉）因涉及澳門巨貪案，早前被澳門初級法院判監五年三個月，佢雖已申請上訴，但依家仲未排到期。尋日佢繼續懶理外界對佢「逍遙法外」嘅指控，同女友甘比等人到灣仔富豪飯堂用膳。點知佢食完飯離開步落樓梯時，突然唔小心差錯腳，成個人失晒重心跌咗落地。好彩當時有甘比扶一扶佢，大劉先跪地、後坐地，總算冇跌個四腳朝天，睇落唔算好傷。
尋日中午十二時十分左右，大劉、甘比同女兒一同乘座駕，抵達灣仔富豪飯堂用膳。約廿分鐘後，大劉胞妹劉玉珍亦乘車到達。大劉等人用膳約一個小時後，約於下午一時半陸續離開。
落梯差錯腳 甘比扶唔掂
近年行動愈嚟愈不便嘅大劉，步出飯堂時一直要扶實甘比隻手。其後落樓梯之時，大劉突然差錯腳失去重心，成個人朝右前方跌下，左右腳一度打晒交叉、失晒平衡。甘比見狀立即左右手並用想拉番起大劉，但大劉體重隨時係甘比嘅兩倍，後者似乎唔係好夠力。喺大堂外撐住把傘等候嘅司機兼保鏢，亦點趕都趕唔切扶住老細。
最終大劉首先右膝落地單腳跪下，然後再向後跌，成個坐咗落飯堂大堂門地下，非常狼狽。好彩大劉屁股肉夠厚，睇嚟唔似好痛，好快就喺甘比同保鏢合力下扶番起身。
醜態盡現 （火羅）爆黑面走人
自己嘅醜態畀喺門外守候記者全程影晒，大劉一面（火羅）爆黑面，一面驚魂未定咁，用晒雙手扶住甘比慢慢上番車離開。大劉神不守舍差錯腳，唔通係擔心緊單官司？
卓妮