政情：傑出人選接象哥棒 傳中出兄弟力撐當議員
明年又到立法會選舉，我哋之前一直有跟進代表中華出入口商會（中出）嘅進出口界功能界別嘅最新選情，選情亦不斷轉變。曾經多次講過現任進出口界議員黃定光（象哥）將會退位讓賢，而有機會接棒嘅就包括中出副秘書長許華傑（Michael）及民建聯副主席周浩鼎（Holden），Holden更係象哥屬意接班嘅人選。不過，最近形勢似乎有變，Michael獲得會內一班兄弟及叔父輩支持，有望出線。
商界人脈廣利會務發展
過去一段時間，象哥無論對外定對內都講過唔會再做議員，希望有人接棒，雖然中出入面無人想佢走，因為佢夠晒地位，只要象哥開到聲話做多一屆，應該無乜人反對。不過，象哥直到最近都無轉口風話要做多屆，聽聞一班年輕嘅中出會員就認為，既然象哥做咗十幾年議員，如果讓位畀其他人，對中出都百利而無一害。加上面對近年政治氣氛咁緊張，中出係時候換吓人，有新景象都唔係壞事。
其實上屆已有聲音話象哥會交棒，接棒人更係前界別議員許長青之子Michael，但最後象哥還再坐一屆。有傳中出一班兄弟近日就想推舉Michael接棒，覺得佢已經「沉默咗咁耐」，嚟緊好應該爭取上位，否則再無機會。普遍人亦覺得Michael資歷較Holden深，在商界亦有一定人脈，絕對有利會務發展。不過，要出線除咗獲兄弟支持外，同時要獲叔父輩支持，據講Michael亦具備呢個條件。照咁睇，似乎象哥可以安心交棒喎。
周浩鼎傳轉攻超級議席
既然被睇高一線，我哋當然問Michael點睇啦，佢就話現時做好會務工作先，講其他嘢都係言之尚早喎。咁講法，莫非Michael想繼續沉默？至於選情忽然插水嘅Holden又點呢？早前有傳佢忽然想出戰超級議席，莫非喺中出方面已打定輸數，所以搵定後路？