政情：踩界疑雲 新同盟白鴿開戰

范國威斥違協調機制

新同盟話，去年九月負責協調泛民嘅民主動力已決定由新同盟派人出選該區，佢哋遂派黎銘澤落區做嘢。不過其後發現白鴿黨成員陳展浚喺該選區出現，又見白鴿黨前成員李家輝落區派單張，仲印製拍住白鴿黨主席劉慧卿（卿姐）嘅橫額懸掛喺澳唐選區。新同盟立法會議員范國威（Gary）被激到生蝦咁跳，譴責白鴿黨違反協調機制，係以大欺小，「實在忍夠」喎！

白鴿黨副主席尹兆堅還擊話，陳展浚只係喺隔籬富君選區做嘢，而卿姐係立法會議員，唔通因為區議會選舉嘅選區劃歸新同盟，卿姐就唔可以為居民提供服務？尹兆堅奉勸Gary唔好道聽塗說、過分演繹。