有「廢鑊」稱號嘅平等機會委員會主席周一嶽又被爆大鑊。有市民投訴指，廢鑊於前年十二月十九日召開嘅委員會會議中講大話，聲稱平機會進行歧視法例檢討和有關立法禁止性傾向、性別認同及雙性人身份歧視嘅可行性研究，都係平機會權力之內嘅事，投訴者懷疑廢鑊「假傳聖旨」，聲稱平機會所隸屬嘅政制及內地事務局（政制局）都同意這看法。然而投訴人經查詢後，發現政制局從沒向平機會表達同意嘅看法，認為廢鑊有誤導公眾之嫌。
對此，平機會尋日回覆本報查詢承認曾收到申訴專員轉交有關投訴，並稱已以書面回覆該市民，內容指平機會與政制局沒有從屬關係，雖然平機會成員定期與政府各部門溝通，但其工作並不需要向政制局作正式徵求書面同意或批准，信中仲死撐不同意喺會議中有說謊、誤導公眾及行為失當之嫌。對於被平機會擺咗上枱，政制局只簡單回應稱，曾收到有關投訴並已回覆投訴人及作出跟進。