中環出更：黃夢瑩力撐80秒文化
前香港青年聯會主席許華傑太太、香港國學中心主席黃夢瑩（Monin）向來瞓身推廣文化，最近佢又創辦咗「八十秒文化集團」，準備喺六月份推出「香港．80秒電影節」，鼓勵鍾意拍短片嘅年輕人，將玩樂轉化為深層次文化，甚至提供後生仔表達不滿嘅發洩渠道，認真有心又夠晒潮流觸覺。
咪睇Monin外表溫柔，原來佢係大律師，百忙之中仍然抽身推廣文化，認真有心。Monin認為，微電影係世界潮流，但時間長短各有不同，而八十秒係一個人專注力最集中嘅時間，啱晒繁忙嘅城市人利用空檔補充精神糧食。
幾經辛苦購獲網址
最近Monin幾經辛苦，說服一位擁有「80seconds.com」網址嘅美國人，將網址賣畀佢，仲話要密初留意電影節嘅動向添。電影節徵求作品嘅時間歷時一年，明年九月會舉行頒獎禮，期間仲會教參賽者將短片剪接成微電影，希望藉此令電影節成為可持續發展嘅文化活動。