政情：倡減官薪 泛民嚴人寬己
立法會尋日繼續辯論議員就財政預算案提出嘅修正案，由社民連梁國雄等激進泛民主派發起嘅「拉布戰」持續，只係開咗四小時會議，就總共三次要求點算開會法定人數，又浪費三十五分鐘開會時間。發言嘅泛民議員全部針對官員開火，要求削減、甚至完全取消主要官員嘅薪酬開支，批評官員成日出錯，唔應該逗咁高人工喎。不過，班泛民「拉布」浪費大量公帑，但又逗足人工，真係泛民拉布金腰帶，官員犯錯削人工！
批馮煒光「係網民」
人民力量陳志全（慢必）要求削減特首辦公室新聞統籌專員馮煒光全年二百七十六萬元薪酬開支，批評馮嘅程度只係一個普通網民，唔應該逗咁高人工。佢話馮煒光曾經錯誤轉載未經求證嘅網上圖片，將特技化妝當成警員受傷，係犯咗低級錯誤。另外，佢又批評馮煒光喺開工時間上個人facebook留言，仲要唔承認，之後被網民發現又抵賴。而慢必嘅黨友陳偉業、公民黨梁家傑亦分別對多位官員作出批評。
按照佢哋嘅邏輯，做錯事、工作時上網就應該削減人工，如果係咁，好多議員應該無一幸免！事關議員唔係專心開會就人所共知，好似有議員曾經喺大會期間上網、睇書同寫大字，而民主黨議員何俊仁更加曾經公然喺開會時上網睇艷照。講到「拉布」議員就更離譜，去年十個月內曾四百五十九次響鐘點算法定人數，虛耗七十小時會議時間，而且多次流會，燃燒大量公帑，呢啲就真係「有口話人無口話自己」。
講到解決「拉布」問題，立法會主席曾鈺成本周一搶閘「剪布」，將長毛就本年度預算案提出嘅三千三百多項修正案，大幅削減至六十多項；又對議員辯論修正案時間設限，確保預算案可於五月底表決通過。
財爺露骨讚剪布
原來財政司司長曾俊華於有關裁決後兩日、即本周三去信曾鈺成，非常露骨地盛讚對方「確保立法會作為立法機關須以有效率方式運作」，「用心勉力」，表現「值得稱許」。曾鈺成就四平八穩回信話，察悉政府對通過預算案時間嘅意見，佢會繼續按照《基本法》及《議事規則》主持會議喎。