政情：沈祖堯搞gag「食橙助生仔」
中文大學校長沈祖堯同香港大學微生學系講座教授袁國勇平日一本正經，但原來有時都幾風趣幽默。佢哋尋日出席創新科技獎學金計劃頒獎典禮時，與得獎學生真情對話。
原本講開食橙可以預防感冒，點知沈祖堯突然語出驚人，話原來食橙可以有助生仔，仲大爆有個朋友連續生咗四個女，食咗幾箱橙之後終於生番個仔。不過，對於現時好多人都是生女，沈祖堯話原因係依家啲橙好貴，即時引起哄堂大笑。
見到沈祖堯大搞爛gag，袁國勇都唔執輸，佢話自己一直都唔會食生嘅食物，因為依家啲細菌好犀利，好多都有抗藥性，原因係好多農夫喺耕種時都用咗農藥，如果生食就會將有抗藥性嘅細菌食埋落肚，萬一將來唔好彩患上癌症要化療，積存喺身體入面嘅細菌就會出嚟作惡。
袁國勇搵洗潔精洗生果
沈就追問袁，莫非連生果都唔可以生食？袁就講笑咁話，可先用洗潔精洗乾淨，之後去皮，再用滾水「拖一拖」，咁就萬無一失嘞！