中環出更：兩行會成員同日公開道歉
錯就要認，打就要企定！尋日一日內竟然有兩位行政會議成員公開道歉，講緊嘅係陳智思同新民黨立法會議員葉劉淑儀。葉劉近日有關外傭提供性服務嘅言論被指係種族及性別歧視，激嬲一眾外傭團體同菲律賓駐港領事，雖然佢日前已喺網上致歉，但尋日再正式發聲明道歉。相反陳智思道歉嘅理由就騎呢啲，佢竟然因為自己曾經做過嶺南大學校董會主席，就為嶺大近日嘅粗口音樂會風波道歉。
葉劉發聲明撲火 外傭團體歡迎
葉劉之前多次解釋佢喺社交網站有關外傭言論嘅圖文，無心標籤菲傭，但一眾外傭團體仍未收貨，前日仲嬲到去佢新民黨總部抗議，要求佢公開道歉，連菲律賓駐港領事都發聲明，關注佢嘅不當用詞。可能葉劉見火頭愈燒愈烈，尋日就發聲明道歉，又話自己同菲傭友好，尊重佢哋勤奮工作同對香港嘅貢獻，仲對自己嘅家傭好似家人咁，希望同外傭團體會面，親自表達歉意。外傭團體總算下咗啖氣，同樣發聲明歡迎佢道歉。
嶺大音樂會辱警 陳智思攬上身
此外，早前有樂隊喺嶺大校園唱粗口辱警歌，身為嶺南大學校董會前主席嘅陳智思尋日回應事件時，突然話自己身為嶺南人，要代表嶺大向公眾致歉。佢又話表演者唔係嶺大學生，但歌曲內容用詞不恰當，可能冒犯部分人，又話學生有空間邀請任何表演者與學生分享，但應尊重唔同意見人士。
卓妮