政情：鬧完又要見 莫乃光心「雄」
泛民早前喺立法會財務委員會就成立創新及科技局拉布，捱到上月中終第二度流產。特首梁振英（CY）隨即變陣，宣布委任原定嘅創科局局長人選楊偉雄，出任包括行政會議成員等三項公職作為補償，惹來泛民議員狂轟。就連本身支持成立創科局、並反對其泛民盟友拉布嘅資訊科技界議員莫乃光（Charles），亦有公開質疑楊偉雄嘅代表性。但原來佢鬧完人翌日，又立即去信立法會資訊科技及廣播事務委員會，邀請政府當局同楊偉雄出席會議，講解對香港創新科技發展同創科局嘅願景，認真矛盾。
邀上委會講願景
楊偉雄日前分別獲委行會成員、新增嘅特首創新及科技顧問、以及經改組後嘅創新及科技諮詢委員會主席。Charles當日回應，雖然有部分業界支持政府呢個做法，但楊偉雄始終唔係問責官員，並無實權，質疑佢可唔可以代表政府意見。
不過我哋發現，原來Charles第二日就急急去信立會資訊科技委員會，要求楊偉雄到委會解釋佢嘅願景同工作計劃。其實又好難怪Charles嘅，佢喺創科局拉布戰中兩面不是人，如大力反拉布撐政府就會得罪盟友，任由泛民拉布又得失選民。如果佢再學其他泛民咁，為咗政治理由同針對CY而堅拒與楊偉雄打交道，同港府嘅創科政策及一眾業界選民只會愈行愈遠，想連任都幾難。惟有學全國人大委員長張德江咁講，口講反對，心裏支持喇！
楊偉雄勁耍太極
講開又講，楊偉雄接受任命後尋晚首度現身資訊科技界嘅公開活動，出席咗一個業界春茗。問及佢因創科局難產而冇局長做，被迫大幅減薪改任行會成員，佢話之前已經預料到，但稍後第三次「闖關」會否再次觸礁，佢就話吉凶難料，並爆咗句英文諺語「When the going gets tough, the tough get going」，大意係會迎難而上喇。楊偉雄又笑言，孫中山搞革命都搞咗十一次先成功，唔通佢預計創科局撥款最少要流產十次？
談及會否應邀到立法會講吓創科局嘅願景，楊偉雄又引用已故蘋果電腦公司創辦人喬布斯嘅名言，話冇可能講得出六個月後嘅願景，始終無答去定唔去。耍太極咁叻，果然係局長人選。