中環出更：佔領累訪客減 立會諗計「清倉」
歷時七十九日嘅佔領行動，不但令三大佔領區內嘅商舖生意大減，位處佔領重災區嘅立法會大樓亦都難逃一劫。根據新一年預算案中有關立法會行政管理委員會嘅部分，立法會二○一四至二○一五年度多方面嘅服務都未能達標。
其中學生及市民參加立法會教育導賞團嘅人數，就分別下跌逾四分一同百分之六，圖書館使用人次大跌四成半，製作嘅紀念品嘅預算開支更按年狂跌五成八，呢張成績表真係滿江紅。
立法會大樓去年六月先反新界東北示威者衝擊，一度取消所有導賞服務。到九月底爆發佔領行動後，大樓再次重門深鎖、閒人免進長達兩個多月。冇訪客嚟參觀，又何來有人買紀念品？結果咪積壓大量存貨囉。
分散地點促銷紀念品
由於立法會使嘅一分一毫都係公帑，為咗唔想亂劈價而招人話柄，惟有諗新招促銷。包括部分紀念品由原本指定喺地面專門店出售，改為分散喺流動攤檔擺賣，只要有人組團到訪就會擺晒出嚟賣。連議員喺立會五樓咖啡閣接待訪客，秘書處都唔放過，專程派員上門推銷，你都咪話唔慘情！