中環出更：又話杯葛？ 泛民政改搶住發言
泛民主派早前揚言會杯葛政改第二階段諮詢，不過話雖如此，轉過頭就好似唔講就唔存在，尋日喺立法會政制事務委員會上爭住發言，批評政改諮詢口號「機不可失」應該改為「得不償失」，有人更加建議政府用公投測試公眾對政改方案嘅支持度，
梁家傑反口 稱肯對話
其中公民黨郭家麒批評，當局漠視民意硬推政改第二階段諮詢，市民一係要原地踏步，一係要硬啃爛方案，又批評政務司司長無因佔領行動調整政改方案，形容對方係住喺火星，想將政改被否決嘅責任推畀議員。公民黨黨魁梁家傑更話，如果特首梁振英（CY）肯喺無前設嘅前提下，同泛民討論香港前路何去何從，泛民都會願意赴約。咦，佢哋唔係曾經講過唔會同CY見面o架咩？
政務司司長回應時話，政改首輪諮詢顯示市民普遍認同政制要向前走，認為議員應該把握歷史機遇，回應民意支持政改。佢又話，根據人大常委會嘅決定，一旦政改被否決，港府唔可以即時重啟政改五部曲，要繼續沿用現有方式由選舉委員會選出新一屆特首。
卓妮