中環出更:「港大飯堂」重開 校友話當年

回憶總是美好,有「港大飯堂」之稱嘅俄式西餐廳「莎厘娜」,早前不敵租金宣布結業,好彩好快就搵到新地方重新開張,尋晚一班「港大老鬼」就返去莎厘娜細說當年,原來七十年代莎厘娜一個學生餐只係賣一元八角,不過有學生去親都寧願畀貴啲食正常餐,都唔食學生餐。

四十名港大校友尋晚雲集莎厘娜,場面好似返回幾十年前咁熱鬧,出席者包括前經濟發展及勞工局局長葉澍堃、港大前校長徐立之、上訴庭副庭長楊振權,前特首高級特別助理路祥安等人,據知本來另一著名港大校友、前財政司司長梁錦松都話出席,但突有要事未能赴會。

講番當年曾經唔食學生餐嘅學生,據講該人就係商務及經濟發展局前局長馬時亨(肥亨),佢作為莎厘娜常客,尋晚仲帶埋太太捧場。肥亨回想當年讀書時成日走堂,正當佢諗住畀其他人鬧時,點知佢太太竟然「出口」護航,話依家唔少商界成功人士,以前讀港大時都有走堂,大讚肥亨當年已有膽識走堂。

葉澍堃成煲湯帶走

葉澍堃尋晚現身時,竟然帶住個大煲走入餐廳,原來佢同兒子都好鍾意飲莎厘娜嘅羅宋湯,次次都要拎走一大煲至滿意。

徐立之則自爆讀書時唔愛飲酒,但近年愛上威士忌,仲話飲酒係必需要嘅社交技巧,至於點解獨愛威士忌,佢就話一枝公好難飲晒一支紅酒,但開咗唔飲晒又好易變,所以寧願轉飲威士忌,放工後返屋企輕酌一杯就啱啱好。

卓妮

第一手消息請下載on.cc東網iPhone/iPad/Android/Windows Phone Apps