中環出更：陳克勤爆「賢妻」係佢前助理
漁農界立法會議員何俊賢（高佬賢）同拍拖三年嘅社工女朋友Elaine本月底拉埋天窗，日前佢就「懶神秘」向議員派「紅色炸彈」。高佬賢嘅黨友陳克勤就透露，Elaine之前做過佢嘅議員助理，亦係婦女團體嘅幹事，之後先至去讀社工。克勤仲爆料，話高佬賢以前咩嘢活動都出席，其實係以參加活動為名，追女仔為實，認真蠱惑喎。
撐場原來追女仔
高佬賢同女友Elaine有情人終成眷屬，黨友都戥佢開心。克勤話，Elaine做佢助理時，高佬賢成日都無喇喇嚟撐場，當時高佬賢都仲未係議員，啲活動又同漁農界無關，所以都覺得好出奇，唔明點解高佬賢咁積極出席活動。克勤曾經試過旁敲側擊咁問高佬賢，但係高佬賢非常口密，直到依家派喜帖，諗番先知原來高佬賢當時係嚟追女仔嘅。
克勤仲話，其實唔止Elaine曾經做過佢嘅助理，Elaine嘅爸爸亦係克勤辦事處嘅義工，所以大家都好熟落。既然高佬賢娶得成老婆，克勤點都有啲功勞，到時免做人情兼飲杯新人茶都好應該啦。
卓妮