中環出更：「稻苗」換屆 百感交集
匯聚中式餐飲才俊的「稻苗學會」，日前舉行新一屆執委就職禮，叙福樓集團執董黃傑龍（Simon）卸任，交棒畀新主席邱金榮（Kelvin），但Simon就「升呢」做會長。Simon笑言退而不休，皆因飲食界正值多事之秋，單係佔領行動已重創飲食界，所以有必要繼續幫吓手喎。
新主席Kelvin上任本應開心，但心情卻百感交集，皆因旗下生意受佔領行動影響。佢在旺角區開咗十六年的米線店在十月底結業，街坊都話唔捨得，尤其係班拔萃男書院學生，得悉店舖要結業，拉埋老師齊「救亡」，仲話要集資救麵店。雖然米線店最終難逃結業命運，但Kelvin話大為感動，期望佔領行動盡快完結，再捲土重來。
黃傑龍「升呢」做會長
至於Simon卸任後仍大計多多，日前佢就為旗下一個牛雜品牌的生意拍檔湯先生打氣，專程飛台北探班，咁啱互聯網專業協會會長洪為民都在當地開會，兩人相約食番碗牛雜麵，真係相請不如偶遇嘞。雖然台灣受問題食品風波困擾，但當地人對牛雜趨之若鶩，開店首日有二百人排長龍，逼爆士林夜市，但Simon就唔使排隊喇。
就職晚宴上，見到激瘦二十磅的香港餐飲聯業協會會長黃家和（Simon），佢大病初愈，但早前已帶隊考察法國及意大利，趁機狂掃冬裝。Simon話，病後身形縮水，衣櫃的加大碼衫已經唔啱着，睇見米蘭咁多名牌，買到唔停得手。米蘭「筍貨」仲有平樓，約一百萬港元就有交易，Simon都話心癢癢想買番間喎。
卓妮