政情：新民黨 自由黨駁火
新民黨同自由黨都以中產為定位，選舉票源相若，早已成為競爭對手。早前自由黨議員田北俊被褫奪全國政協委員資格及辭去黨魁一職後，新民黨主席葉劉淑儀隨即大打開口牌話有意撬自由黨黨員過檔，加上兩黨在近期佔領行動上都高調撐警隊，已經爭到出晒面。點知早幾日葉太仲向自由黨鍾國斌所屬嘅紡織及製衣界選委開刀，建議將該界別選委席位撥啲畀其他界別，惹來鍾國斌對葉太言論深表遺憾，雙方火藥味甚濃。
葉劉：畀機會其他界別
葉太早幾日講到，本港的紡織及製衣界嘅重要性已經今非昔比，建議將該界別提委會嘅席位撥啲畀其他界別。身為該功能界別議員鍾國斌尋日就發出新聞稿，對葉太嘅言論深表遺憾，批評有關言論完全唔符合實際情況，無視業界對香港作出嘅巨大貢獻，更呼籲葉太下次發表同產業發展、商業運作有關嘅言論前，應虛心請教業界，以免作出錯誤同無知嘅建議。單睇鍾國斌呢段反擊言論，已經怒氣衝天。
對於鍾國斌提到，雖然業界將部分生產北移，但香港仍然係全球主要嘅採購中心之一，經濟活動相當活躍。葉太就反駁話，其言論並無抹殺該業界的貢獻，亦無取笑成分，只係香港嘅紡織及製衣業的生產、品質控制等範疇已轉移到境外，近年亦都無顯著的經濟貢獻。「喺咁嘅情況下，業界係咪需要十八票咁多呢？將提委會嘅席位撥啲畀其他界別，唔代表佢個界別冇晒代表o架！」葉太強調，建議只係想畀多啲機會其他界別發聲。
鍾國斌：外行人講外行話
鍾國斌話，葉太過去從沒有在商界工作，其言論反映佢對業界發展一竅不通，外行人講外行話。葉太就還擊話，尋日出席咗一個講座，聽到有本地時裝設師慨嘆依家好難搵人做版房，由此證實業界確係今時唔同往日，更反問鍾國斌為業界做過啲咩。不過佢重申只係諮詢吓大家，好歡迎唔同人畀意見添！其實過往都有人講過漁農界現時六十個選委數目太多，但建議削減紡織及製衣界選委數目就較少人提到，未知今次事件會否令兩黨新仇舊恨全面爆發呢？