政情:周永康累茶餐廳罷食恐慌

佔領行動由開始至今消息滿天飛,唔少網民都對佔領或反佔領嘅相關人士進行大「起底」,例如之前網上就有人公開學聯同學民思潮一眾成員嘅住址,又話佢哋係有錢仔女,但眾人均一一否認。當中學聯秘書長周永康就曾經被網民指佢爸爸係布廠老闆,話周永康用市民捐款向爸爸買入唔少帆布,益爸爸大賺一筆,但周永康及後證實傳聞係子虛烏有。

近日網上又流傳周永康同香港仔某茶餐廳東主有親戚關係,唔知茶餐廳負責人係咪擔心有人會響應網民號召罷食,尋日喺門外張貼澄清告示,嚴正聲明學聯周永康同該店東主並無任何親屬或朋友關係,呼籲食客唔好輕信網上傳聞。估唔到網上傳聞玩到周永康外,仲玩埋同佢無關嘅食肆,認真累街坊。

(互聯網)

第一手消息請下載on.cc東網iPhone/iPad/Android/Windows Phone Apps