政情：搞愛心廚房「惠民」派飯
派飯畀弱勢社群已成為熱潮，愛茗茶嘅十大傑青葉惠民都自掏腰包一百萬元搞「人情味愛心廚房」，落手落腳買餸炒菜兼派飯。葉惠民自嘲係「浪子」，早年創立香港茶道總會外，過去七年仲係音樂人，為樂壇新人作曲填詞，可惜栽培出幾個新人都離佢而去。傷透心下，佢年初把心一橫花大筆積蓄，喺佐敦街市內開設愛心飯堂，每次派五十至一百個飯盒予老人家、傷殘人士及路宿者等。
本身係中華廚藝學院顧問嘅葉惠民，目前以自負盈虧嘅模式，將飯堂打造成韓燒及火鍋店，賺到嘅錢就用來派飯。因為飯堂生意剛起步，現時只能不定期派飯，期望將來增加更多派發次數。葉惠民話，唔少人知佢派飯都主動幫襯，亦有人幫手做義工。不過，試過有個人聲稱做義工，點知完成工作後要收取時薪八十五元嘅工酬，葉惠民最後企硬，打發對方離開，真係唔知好嬲定好笑。