政情：大嶼山露營車 陳恒鑌一宿難忘
佔領行動持續佔領港九旺區多個星期，已為人父嘅立法會議員陳恒鑌（Ben）都為天倫之樂選址頭痕，但身兼大嶼山發展諮詢委員會委員嘅佢就靈機一觸，繼去年暑假一家三口去大嶼山長沙海灘住宿「冷氣帳幕」一試難忘後，日前再赴大嶼山另一旅遊勝地塘福，試住外國盛行嘅露營車（caravan）。阿Ben住後大讚露營車概念，仲力撐大嶼山可以倣效台灣鼓勵民宿產業添。
指港有條件發展民宿
向來係廿四孝父親嘅阿Ben笑言，自佔領行動展開後，搞到佢都少咗好多時間陪囡囡，加上囡囡成日扭計去旅行，為滿足囡囡願望之餘，又唔想吓吓搭飛機舟車勞頓，決定帶佢去塘福試住露營車。露營車日租千多元，在郊外都有舒適住宿，煮食爐具亦一應俱全，夜晚踏出車外就可以睇到滿天星星，好有台灣民宿feel（感覺）咁話。
阿Ben慨嘆香港絕對有條件發展民宿產業，所謂「去到嘅就係公園，去唔到嘅只係爛地」，發展唔一定係破壞，一草一木都唔掂得亦唔見得係保育，希望政府正視問題。