政情：大嶼山露營車 陳恒鑌一宿難忘

指港有條件發展民宿

向來係廿四孝父親嘅阿Ben笑言，自佔領行動展開後，搞到佢都少咗好多時間陪囡囡，加上囡囡成日扭計去旅行，為滿足囡囡願望之餘，又唔想吓吓搭飛機舟車勞頓，決定帶佢去塘福試住露營車。露營車日租千多元，在郊外都有舒適住宿，煮食爐具亦一應俱全，夜晚踏出車外就可以睇到滿天星星，好有台灣民宿feel（感覺）咁話。

阿Ben慨嘆香港絕對有條件發展民宿產業，所謂「去到嘅就係公園，去唔到嘅只係爛地」，發展唔一定係破壞，一草一木都唔掂得亦唔見得係保育，希望政府正視問題。