政情：政總無飯開 公僕捱貴餐

政府總部飯堂做埋明日就結業，但新飯堂最快要一個月後先可以開張，即係話一班飯堂捧場客有成個月要出外搵食，除咗要同其他金鐘上班族一齊迫外，大熱天時外出都咪話唔辛苦。本來班公務員可近少少行過中信大廈都搵到連鎖快餐店，但點知又撞啱間快餐店搞裝修，據聞呢間快餐店嘅燒味飯係公務員至愛，睇嚟未來一段時間都無啖好食兼要捱貴飯喇！