政情：梁齊昕「賣廣告」幫學生補英文？

特首梁振英（CY）女兒梁齊昕要搵私人補習幫補零用錢？活躍網絡世界嘅齊昕尋日喺社交網站發文，中英夾雜咁問有冇小學生需要一對一英文補習服務，仲保證提供頂級教學質素，叫價每小時三百元；其後唔知係咪自覺叫價太高，改為中小學生同價，但唔知係咪齊昕親自教導。不過，有網民就留言嫌齊昕收費太貴，話出面嘅小學私補一百元有找，叫佢留意吓行情先賣廣告。曾就讀英國名校倫敦政治經濟學院（LSE）嘅齊昕即時反駁，叫對方睇吓自己咩質素（quality）先評論喎。不過，呢個私補廣告好快就被刪除咗嘞！