洗衣機揈貴婦狗 警摸上門拉人

涉嫌虐待動物被捕兩男分別姓黃（廿二歲）及姓梁（卅八歲），現准保釋候查，下月中旬向警方報到。據悉，梁與黃皆為體重管理及營養教練，兩人為師徒關係，不時在fb貼相展示身形吸客。被暱稱「男神BB」的梁在fb炫耀：「一個月瘦咗十六磅！」又經常拍片娛己娛人，獲不少友人畀like。黃則標榜「一個月減卅二磅」，更以贏得體重管理挑戰賽總冠軍為賣點。慘遭塞入洗衣機「狂揈」的為成年雌性玩具貴婦狗，疑由黃所飼養。

小狗塞滾筒後冚蓋

梁在七月杪，把一段長約廿一秒的虐狗片段轉貼fb，留言：「有人殺死我條女呀！」片段顯示，梁以手機拍攝，黃則手抱小狗柔聲道：「BB乖呀，爸爸幫你沖涼先啦！」然後把小狗塞入揭蓋式洗衣機滾筒內，欲將機蓋冚上，期間小狗一度伸出小爪抓着黃的大腿，狀甚可憐，梁見狀即問：「喂，做咩呀你？」有人聞言一度停止動作，又稱：「做咩啫，我擺隻狗入去沖涼先嘛！」梁聽罷大驚：「咪玩我啦！」惟有人未予理會，續把機蓋冚上，更快速按掣啟動洗衣機，梁則高聲呼喝：「喂！你講真㗎？喂！你係咪傻㗎白癡！」片段到此完結，小狗則生死未卜。

片段曝光後，雖然有人心虛迅速刪除，不過有網民卻早着先機，把短片拷貝後再上傳網站，不少網民睇片後皆看不過眼，怒斥兩人「貪玩」虐狗。面對網民怒插，梁及黃見勢色不對，一度在網上貼文解畫，其中黃聲稱：「各位我同男神BB挽（玩）下姐（吓啫），你地（哋）唔洗（使）咁認真，男神BB好錫狗狗。」梁則強調事前毫不知情，對黃的行為亦感詫異。

不過，有愛護動物組織睇片後，認為有關人士涉及虐狗，於上月向警方舉報，案件交旺角警區刑事調查隊跟進。

探員深入調查後，在昨晨約七時半掩至旺角花園街一單位拘捕兩人，警方同時在單位內發現懷疑被虐小狗，牠無表面傷痕，事後已由愛協帶走作進一步檢查。