中環出更：CEO決高下 楊立門膺歌王
城中十五位CEO陪伴一班青年人追夢，前晚在上環西港城參加「與CEO對唱」一決高下。為爭勝，班CEO各出奇謀，鬥足一晚難分難解，最後由有「AO（政務官）歌王」之稱嘅民政事務局前常任秘書長楊立門（Raymond）與拍檔潘伯仲以一曲《愛是永恆》奪冠。至於賽前胸有成竹嘅香港大學醫學院院長梁卓偉（Gabriel），佢同拍擋陳霆瑋合唱一曲《追》就未有獲獎。
在幾百人面前獻唱，班CEO表現水準咁高，背後一定做足功課。休假中嘅Raymond索性請拍檔返屋企食「住家菜」，順便練埋歌。
女童軍前香港總監彭徐美雲都唔執輸，出動私伙花旗蔘水畀拍檔劉煒彤「養聲」，佢老公彭曉明仲勁，想話拎支人參畀拍檔韓照昌補吓氣，但最後驚太補流鼻血，都係咪搞嘞。
梁卓偉《追》夢失敗
中電企業發展總裁莊偉茵（Quince）最大陣仗，請來以前在國泰工作時合組隊Band「YOUNG ONCE」晒冷，合作天衣無縫，可惜最終落敗，Quince話最緊要好玩，勝負唔重要喎。至於Gabriel就旺人唔旺自己，與拍檔陳霆瑋合唱一曲《追》未有獲獎，但係陳霆瑋轉頭喺個唱環節就奪得亞軍。
眾CEO在台上施展渾身解數，瑞士寶盛銀行中國及香港區董事總經理施國榮嗰隊得第二名，季軍就由彭太隊伍奪得。「歌手一號」歌唱比賽搞手兼大家樂集團主席陳裕光話，樂見唔少青年參賽者與CEO成為好友，當中更有人被CEO賞識，獲安排新工作，亦有人獲邀出席演唱會嘉賓。個個追夢成功，確係飲得杯落。
卓妮