- on.cc 東方互動主頁
- 5月13日 (二)
勞工及福利局局長張建宗同太太喺香港合共持有九個物業，因而外號叫「官場樓王」。但原來佢嘅下屬、勞福局副局長蕭偉強（Stephen）都唔輸蝕，本港都有三個物業揸手。唔知佢哋得閒嘅時候會唔會傾吓香港樓市、講吓投資置業嘅心得呢？
上任未夠半個月嘅Stephen，近日提交咗財務及其他利益登記資料。佢申報同任職高級人力資源經理嘅太太鄧綺文，合共持有三個九龍區嘅住宅單位，有別於鍾情於港島區嘅張建宗。當中兩個單位喺九龍城區，一個係兩公婆持有嘅自住單位，另一個單位就由Stephen持有、供家人居住。此外，Stephen太太就喺油尖旺區持有另一個住宅單位，亦都係供家人居住。
講開又講，勞福局政治助理黎穎瑜（Jade）去年上任亦火速申報同丈夫喺中港及日本合共持有四個單位。不過，佢上月就更新資料，依家兩人喺廣州、日本及倫敦共持有三個物業。原本喺廣州有兩個商業單位，但依家只剩下一個，而佢丈夫持有嘅日本同倫敦嘅住宅單位就用嚟放租。佢哋連香港物業都賣埋，莫非係樓市淡友？
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
