政情：林新強「因言辭職」 轟《蘋果》日日攻擊
香港律師會前會長林新強（Ambrose）早前因為發表白皮書言論，被會員召開特別會員大會（EGM）並通過不信任動議，最終選擇辭職收場。Ambrose似乎氣憤難平，尋日接受內地官媒訪問，點名批評提出EGM嘅兩名律師、公民黨法律界議員郭榮鏗（Dennis）以至《蘋果日報》，話成件事係有人喺背後發功，自己係「因言獲罪」、「因言辭職」，睇嚟今勻佢真係要絕地反擊喎！
點名批兩律師及郭榮鏗
對於不信任動議背後係咪有政治力量推動緊，Ambrose就點名批評提出EGM嘅律師蔡家玲，係「民主阿婆」陳方安生競選立法會議員嘅核心成員，又話另一律師任建峰就同「搞事四人幫」嘅壹傳媒老闆肥佬黎、「李漢奸」李柱銘一齊登山，又幫過Dennis競選。
Ambrose又質疑有人推動《蘋果日報》日日攻擊佢，「呢啲版面做成廣告要幾多錢？」，仲報道大律師公會前主席余若薇發言，反問「律師會嘅事情同佢有乜關係？佢點解喺報紙上說三道四？」，所以感覺到喺呢件事上，政治力量介入好深。
Ambrose話，Dennis煽動會員攻擊佢，坦言Dennis應該出來調解，而唔係偏幫某一邊，「但他喺背後捅刀子，挖我嘅『黑材料』，攻擊我用『專業聯合中心』賺大錢」，更質疑佢係中心業主（市建局）其中一位董事，白皮書一出，佢就即刻攞盤數出嚟睇，企圖火上加油。
「法官不諗政治唔可能」
講番法官「愛國」，Ambrose質疑終審法院前首席法官李國能話「法官沒有老闆」係冇講到重點，因為法官判案必須考慮國家利益及政府政策，考慮法律背後立法的意願、背景，呢啲都係政治，又話法官完全不諗政治係唔可能，都會受報紙、輿論影響。
我哋問過Dennis，佢就希望Ambrose尊重律師會會員意見，重申自己冇參與EGM，大部分時間冇作評論。至於佢身為市建局非執董，Dennis話市建局都冇盤數，又點公開呢？認為對方對香港法治有好大嘅判斷錯誤。任建峰亦回應話，Ambrose已提出過上述言論，而佢亦否認過，若Ambrose想循環再用有關言論，佢尊重言論自由喎。至於蔡家玲就唔喺香港，所以未能回應。