政情：「老店」民協畀學民踢落榜

香港社會日益兩極化，中間溫和派嘅生存空間愈嚟愈窄。港大民調尋日公布最新嘅本地政團知名度同表現評分排名，老牌溫和泛民政黨民協同新興嘅中間派建制政團新民黨，雙雙因為知名度不足而跌出十大政團排名榜。取代佢哋地位嘅，係同樣成立咗冇幾年嘅激進泛民政團工黨與學民思潮。之不過，知名度高唔代表民望高，受訪者對學民思潮嘅表現評分只有四十五點一分，不但唔合格，而且仲低分過民建聯。反觀民協跌出十大後，評分仲有五十四分嘅不俗水平，爭取民主前後已有四十年嘅民協馮檢基，都總算老懷安慰囉。