- on.cc 東方互動主頁
- 5月8日 (四)
勞工界立法會議員郭偉強作為立法會新丁，一直冇咩人識，如果下屆轉直選可以話係危危乎。尋日佢就無啦啦學埋啲激進泛民主派議員咁提出私人條例草案，將現時法定最低工資「兩年一檢」改為「一年一檢」，仲建議最低工資水平應該定為每小時三十九點七元咁話，開價仲高過泛民黨派，真係獅子開大口。不過，私人條例草案通過嘅機會可以話係微乎其微，好大機會都係煲冇米粥，志在谷下知名度。
郭偉強趁最低工資委員會進行公眾諮詢期間，捉實最低工資呢個打工仔最關心嘅議題，聯同立法會議員葉偉明齊齊舉行記者會爭取曝光。不過，過往議員提出私人條例草案都係冇米粥，郭偉強呢一煲都可能唔例外。我哋問佢有冇信心其他黨派會支持佢嘅草案啦，點知佢就話喺民生事件上，全香港應該只得一個黨喎。唔知佢咁講係太天真定太樂觀呢？抑或係志在參與，一心諗住谷吓人氣呢？
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
