政情：議員冇水抽 退會潮趨烈

毓民頂唔順　又退多兩個

毓民話，自從退出人民力量後就「一支公」，仲要身兼多個委員會，費事分身不暇畀人話佢出席率低，都係自行「減磅」算數。

毓民上個月已經退出長期護理政策聯合小組，尋日又退多兩個會。佢就話，本身除參加咗八個事務委員會外，亦都係政府帳目委員會同議事規則委員會成員，加埋成十個委員會，咪話佢頂唔順，幫佢手嘅議員助理都話搞唔掂，所以迫不得已退出。

除咗毓民之外，毛孟靜亦都退出融合教育小組同埋發展事務委員會，而原本係醫療保障計劃小組成員嘅議員方剛同莫乃光亦退咗會。

至於競選時連競選歌都唱話要「堅守西九」嘅梁美芬，竟然退出監察西九文化區計劃嘅聯合小組，小心被選民算帳呀！