中環出更：劉怡翔夫婦 同場少交流

徇眾要求先肯合照

劉太尋日以主人家身份滿場飛，同一眾嘉賓打招呼，相反James就只係企埋一邊同一位外籍女士雞啄唔斷，之後又獨自去攞食物。無理由兩公婆同場都唔影張相，最後James喺徇眾要求下先至企上台同太太影咗一張合照。劉太透露，佢早前行勻十八區，了解各區議會點樣推廣婦女政策，又話尋日要出席多場婦女界慶祝活動，近期幾乎要全日工作陪唔到丈夫喇。

James就話，雖然大家公務繁忙，但自佢加入官場後，不時喺公開場合見到太太，所以唔覺得少咗時間見。不過，被問到會唔會抽時間慶祝婦女節，James就尷尬話成日都會同老婆慶祝喎。