中環出更：青聯靚女非常之旅
經典浪漫電影《北非諜影》膾炙人口，每當電視重播都令人回味。原來香港青年聯會賢慧社召集人周沁同青聯會董陳穎妮、菁英會會員林玥彤及好友Jenny四位靚女，喺上月農曆新年期間曾結伴去北非摩洛哥旅行，雖然行程中並冇遇到好似影星堪富利保加咁嘅型男，但就有好多難忘回憶。唔好睇佢哋幾個咁斯文，今次旅程唔只喺馬拉喀什一帶遊古城咁簡單，原來仲深入撒哈拉沙漠，認真大膽。
撒哈拉沙漠一帶早晚溫差好大，佢哋竟然無懼風沙同寒冷紮營過夜。四位靚女話，佢哋同當地司機導遊打成一片，圍住營火食飯唱歌跳舞，姊妹們喺漫天星星下促膝長談，喺沙漠上睇日出、騎駱駝嘅經歷真係畢生難忘。
回程遇大風雪歷險
不過，佢哋返回古城途中卻遇到大風雪，山路受阻，幸好司機導遊非常專業，當機立斷兜去另一條比原定路線多十小時車程嘅公路，千辛萬苦先至返回馬拉喀什，佢地講番件事仍難掩激動心情。
返到馬拉喀什嘅翌日，咁啱係年三十晚，佢哋去咗當地一家好Grand嘅皇家酒店品嘗一餐摩洛哥風味團年飯之餘，仲試咗當地傳統Spa，好舒服咁迎接馬年。總結今次行程，雖然路程遙遠又辛苦，但佢哋話非常值得。講番賢慧社近況，周沁話四月中會再舉辦一場名人分享會，而近日就同幾位好姊妹勤於練跑，備戰友好組織百仁基金一年一度嘅beHERO十公里馬拉松慈善跑，難怪幾位愈嚟愈fit喇！